ရခိုင်ရို့၏ နောက်ဆုံးဘုရင်နန်းစိုက်ရာဖြိုက်တေ မြောက်ဦးမြို့ရှိ ရှိ်ဟောင်းသာသနာ အဆောက်အဦီး၊ ရှိဟောင်ဗိသုကာ လက်ရာတိကိုရေ ပြုပြင်ထိန်းသိမ်းမှု မရှိရေ အတွက် ပိုပျက်စီးလာပြီး တပိုင်တနိုင်ပြည်သူတိကိုလုပ်ပိုင်ခွင့်လဲ မပီးကြောင်းသိရသည်။
ရှိဟောင်းဗိသုကာလက်ရာ၊ ဘုရားပုထိုးရုပ်ကြွင်းတိကိုေ မြာက်ဦးယိုင်ကျေးမှုဌာနက ထိန်းသိမ်းထားကေလဲ ပြုပြင်မှုမရှိဘဲ ပစ်စလက်ခက်ထားပြီးကေ အရေးမစိုက်ကြောင်းလည်းသိ ရသည်။
“အကျွန်ရို့က ဇာတီတိမာရှိရေ မြက်တိကို ရှင်းဖို့ အတွက် အာဏာပိုင်တိကို လားပြောကေလဲ မလုပ်ရလို့ရာပြောရေ။
သူရို့ခွင်ပြုမှ လုပ်ရဖို့လတ်၊ အဂုဆိုကေ မြက်သသောနန့် ကြည့်မကောင်းပါ၊ယေလဲမြောက်ဦးယဉ်ကျေးမှုကလုပ်ပီးစွာတိမရှိကာ”လို့ေ မြာက်ဦီးမြို့ခံတဦးက ပြောပြသည်။
ယိုယွင်းပျက်စီးနိန် ရှိဟောင်း ယိုင်ကျေးမှု အမွိ အနှစ်တိကို ပြုပြင်ရန် အလှူရှင်တိ ရှိကေလဲ လုပ်ပိုင်ခွင့် မပီးရေ ဖေသာကို ယိုင်ကျေးမှု ဌာန ကိုရာ အပ်ရကြောင်းသိရသည်။
“ အလှူရှင်တိက ရှိရေ၊ ပျက်စီးနိန်ရေ ဘုရားပုထိုးတိကို ပြုပြင်ဖို့ အတွက် မြောက်ဦး ရှိဟောင်း သုတေသန ဦးစီးပါးက ခွင့်ပြုချက်တောင်းကေလဲ လုပ်ပိုင်ခွင့်မပီးပါ ၊ဖေသာကိုရာသူရို့ဘားကို အပ်ကေ သူရို့လုပ်ပီးဖို့လို့ရာပြောရေ။
သီးခြားဒေပိုင် လုပ်ပိုင်ခွင့်မပီး၊ သူရို့လဲ မလုပ်ဆိုကေ ကြာလာကေ ရခိုင် ရှိဟောင်း အမွိအနှစ်တိ တဇတဇ ပျက်စီးလားနိုင်ရေ”လို့ အဆိုပါ မြို့ခံက ဆက်ပြောသည်။
မြောက်ဦးမြို့ရှိ ရှိဟောင်း အမွိ အနှစ်တိကို ကွယ်လွန်ခရေ ရခိုင်/မြန်မာပဏ္ဍိတ် ဆရာကြီး ဦးဦးသာထွန်း၏ ဖော်ထုတ်ခမှုကြောင်း ရှိဟောင်း ပုထိုးတော် အချို့ကို ဂနိတိုင်မြင်တွိနိန်ရခြင်း ဖြိုက်သည်။
မြောက်ဦးနန်းတော်ကုန်းလည်း ပြန်လည်ပြုပြင်မှု မရှိရေ အတွက် ပျက်စီးစပြုလာကြောင်း လည်းသိရသည်။
ပြန်လည် ပြုပြင်ရေ အဆောက် အဦးတချို့မှာ ရှိဟောင်း ရခိုင်ယိုင်ကျေးမှု လက်ရာ မဟုတ်ဘဲ ဗမာလက်ရာ ဖြိုက်နိန်သည်။
မြောက်ဦး အရှိဘက်ရွှေဂူတောင်အနားရှိ ပျက်စီးနိန်ရေ ခြင်ကိုက်ပိဋကတ်တိုက်ကိုလည်း ပြီးခရေနှစ်က ကြံ့ဖွပါတီကပြန်လည် ပြုလုပ်ခကေလဲ ပြီးစီးအောင် မလုပ်ခကြောင်းသိရသည်။
သျှစ်သောင်း ပုထိုးတော်ကြီး မုခ်ဝလည်း အရင် ရှိဟောင်းလက်ရာ မဟုတ်ဘဲ ဗမာလက်ရာ ဖြိုက်နိန်ကြောင်း ရှိဟောင်းလက်ရာကို လေ့လာလိုက်စားသူတစ်ဦးက ကောက်ချက်ချသည်။
မြောက်ဦးမြို့သည် ရခိုင်ဘုရင်ရို့၏နောက်ဆုံးနန်းစိုက်ခရေ မြို့ဖြိုက်ပြီးကေ သက္ကရာဇ် ၁၁၄၆ ခုနှစ်၊၁၇၈၄ ခုနှစ်၊ ဒီဇင်ဘာလ (၃၁) ရက်နိမှာ ဗမာဘုရင်ရို့၏ ကျူးကျော်စစ်ကြောင်း ပျက်စီးလားပြီး နန်းတော် တစ်ခုလုံးလဲ ပြာကျခရေပိုင် ရခိုင်တို့၏ တန်ဖို့ မဖြတ်နိုင်ရေ ရှိဟောင်း အမွိအနှစ်တိကိုလည်း ဗမာပြည်သို့ယူဆောင်လားကြောင်း ရခိုင်သမိုင်းမှတ်တမ်းများ အရသိရသည်။
ဗမာရို့ကလဲ ရခိုင်တိဘားက ရရှိလာရေ အမွိအနှစ်တိရေ ဗမာပြည်မှာ မရှိကြောင်းကိုလည်း ဗမာပြည်ကလာရေ ရခိုင်မြောက်ဦးနိုင်မော်ကွန်း အရသိရသည်။
လက်ရှိ အနိန်အထားမှာလည်း ရခိုင်ရှိဟောင်း အမွိအနှစ်တိကို တစတစ ပြည်မသို့ယူဆောင် မှုတိရှိကြောင်းလည်း လေ့လာသူတိကဆိုသည်။
ပြည်မ ဘက်ရှိ မန္တလေး မဟာမုနိ၊ ရှင်ကျော်မုနိ၊ ဇလွန်မြို့ပြည်တော်ပြန် မြတ်စွာဘုရားရို့လည်း ရခိုင်က ယူဆောင်လားရေ ရှိဟောင်း ဘုရားတိ ဖြိုက်ကြောင်း သိရသည်။
(ရခိုင်ရိုးမ သတင်းဌာနမှ ကူယူထားပါသည်)
No comments:
Post a Comment